Jam 2 | MHL | STEP | Aria emar unowik, ni yiena Maneka Yeesus Krais opor kekanowa wiar opap-na mua unowa epaskun wia wueka. Yeesus Krais eena umep ona parin onaiya iikirak nain.

James 2

Mua sira epaskun wia wuowa

1 Aria emar unowik, ni yiena Maneka Yeesus Krais opor kekanowa wiar opap-na mua unowa epaskun wia wueka. Yeesus Krais eena umep ona parin onaiya iikirak nain. 2 Ni iir oko-pa lotu onowa naep niam fiirimep ikaiwkin mua erup niar kererikuan. Mua oko wapen maa bala eliwa wuap ne mia suuwowa eliwa suuwap kererinon, ne mua oko mia suuwowa awona pere-perenowa nain suuwap kererinon. 3 Ne ni mua mia suuwowa eliwa ikua nain wiar urufap kemelami ane-puukami maakowen, “Aa sira eliwa, epap pokow epa eliwa-pa feek poka.” Ne mua oko, maa marewa nain poromi maakowen, “No ekap eenek iimare,” e maakowen, “No miiwa-pa neek poka,” naap maakowen. 4 Ni mua oko wia kookaliman ne oko weetak. Ni sira oniman niena ikiwos samora nain ookami naap oniman, ae-na.

5 Naeya emar unowik, ni kema suuweka, Mua Maneka-ke yena teeria-pa efar ikemik wi nain kakeniw ikok Yeesus Krais opora kekanowa wiar opuk naek. O ona iiriw opora feenap maep koonowak, “Wi mua yo efa kookalimik nain yena pika kemena-pa efar ikaikuan,” naap maek. Naap maep wi mua unum marew nain yena kemena-pa efar ikauk naep ona iiriw wia nanikap-puak. 6 Ne nis-ke wi mua unum marew nain wia poromi emina wia ururowaman. Ne wi maamuma mua wia kookaliman. Nain wis-ke nia samorimik, ne medistret mokoka-pa opora-pa nia wuimik. Wi naap me nia onimik naiman-i? 7 Ne wi Yeesus Krais unum maneka eena ni ookam-ikaiman nain firekimik nain-ke, ni nain me wiar kema suuwiman-i?

8 Sira maneka Mua Maneka opora-pa ikua nain feenap maek: “No mua oko wia kookale, nena name kookalin naap.” Sira maneka nain balisow ookap-na ni sira eliwa onaman nia nainen. 9 Nain ni wi mua unum onaiya ikemik nain wia kookalemi wi mua unum marew nain wia porowen-na wia kookalowa sira nain puukowen. Ne Moses sira wuomakek nain ookami nia maikuan, ni sira puukaman. 10 Moram o mua Moses sira wuomakek nain ookam-ikok sira kuisow muuta puukinon-na, aria Mua Maneka-ke mainon, sira unowa nain iiwawun puukak nainon. 11 Moram, ona sira yiek nain feenap maek, “Ni mua oko emeria me wiar mufeka,” neemi “mua oko me wia ifakimeka.” Nain no mua oko emeria me wiar mufon, ne no mua wia ifakimon. Nain no sira puukan nefa mainon.

12 Aria naapeya niena soomarowa ne aakunowa pun Mua Maneka sira yiek nain kakeniw ookap soomareka. I sira kamenap onimik nain mokakiya yiar ookap yia kiripominon. Naapeya i Moses sira wuomakek nain baliwep ookiyen-na pina marew eliwa ikaiyen. 13 Moram, ikoka Mua Maneka yia mekawow epa nain epeya, no mua oko me wia kemalep asipan nain ikoka os pun kirep me nefa kemalinon. Naapeya yo feenap mainen, no mua wia kemalinan-na no sira samora onomaken nain Mua Maneka me nefa kiripominon.

Yeesus opora wiar opap sira ookowa nain

14 Aria naapeya emar unowik, ni feenap maowen-na, “Yo Yeesus Krais opora wiar opiyem.” Opora oram maneka maiman nain ni sira-ke, yo mua naap nain-ke me niam urufiman. Ni sira naap nain Yeesus nia aawinon-i? Weetak. 15 Aria sira oko feenap. Niena Yeesus teeria epaskun mua e emeria oko mia suuwowa ne maa enowa iiwariya nain no maa kuisow-ko iwow marew feenap maakinan, “No ikiwemi bala balisow name opap maa enep kema sonom eliwiw ike.” Nain o asipowa maa-ko me iwon. No opora muutiw maaken nain, eliw asipinon-i? Weetak. 17 Naapeya no Yeesus Krais opora wiar opiyem naap name naen, nain no mua wia asipowa sira nain me ookinan-na no opora naap name maen nain maken marewa ikainon.

18 Aria mua oko-ke feenap mainan-na, “No Yeesus Krais opora wiar opiyem maen. Nain yo wia kookalowa sira eliwa oniyem,” naap mainan. Nain, aria yo opora feenap kiripominen, no sira eliwa onowa marew, oram maneka Yeesus Krais opora wiar opiyem main nain kamenap makena nefar urufinen. Ne yo Yeesus Krais opora wiar opami wia asipowa sira onamkun efar urufap makena efa nainan. 19 No feenap main, Mua Maneka ona waisow. Naap main nain eliwa. Wi sawur samora pun Mua Maneka ona waisow naep mia fufuep karanimik. Naapeya nos pun Mua Maneka kema suuwap baliwep ike.

20 Ni momor ika-ke, yo balisow-ko nia maakemkun amisareka. Yeesus Krais opora wiar opimik nain me akimowa, oram maimik nain maken marew. 21 Fain kema suuweka. Iiriw ekera yiena nomokow fiira Abraham Mua Maneka-ke maakeya opora osiw ookap, o patirowa naep ona muuka Aisak esimsa-pa inawap-puap ifakimekam naep onak. Naapeya Mua Maneka sira naap urufap o mua kaken eliwa-ke naek. 22 Ni nain kema suuwiman-i? Abraham Mua Maneka opora wiar opak, ne opora maakek naap kakeniw ookak. Sira onak nan Mua Maneka opora wiar opak nain maken akena wiar urufamik. 23 Ne opora fain iiriw Mua Maneka opora-pa siisimep-puamik nain iiwawun pepek erak. Feenap,

“Abraham Mua Maneka opora wiar opak, naapeya Mua Maneka-ke o mua kaken eliwa-ke naek.”
(Yenesis 15.6)

Ne pun yena emar-ke naek. 24 Naapeya is pun kema feenap suuwikua, Yeesus Krais opora wiar opimik nain oram maowiw maem-ikaiyen-na Mua Maneka ni mua kaken eliwa-ke me yia nainon, weetak. I Yeesus Krais opora wiar opam-ikok sira eliwa onamkun mua kaken eliwa-ke yia nainon.

25 Aria iiriw ekera pina emeria oko unuma Reap, o sira onak nain kema suuwiman-i? Wi Isrel mua-ke owowa ikum wia urufu naep owowa wiar urupemik. Ne owow mua papako-ke wia opu naep akupiwkin os-ke wia aawep ona koora-pa wia pipilimep-puak, ne naap ikok wia sesekeya era oko aawep ikiwemik. Sira naap oneya Mua Maneka-ke o emeria kaken eliwa-ke naek. 26 Nain ni feenap kema suuweka, i ewar mia-pa yiar ikua nain yia piipuinon-na mia uminon. Ne sira naapiw, Yeesus opora wiar opowa pun naap, oram maowiw maemi sira eliwa onowa marew ikaiyen-na, opora opimik naimik nain pun maken marew.